Umuryango w’abahoze ari abanyeshuri barokotse Jenoside yakorewe Abatutsi mu 1994 (GAERG) n’umuryango w’abakiri abanyeshuri bayirokotse (AERG), ku wa 7/3/2015 bafashe mu mugongo abasizwe iheruheru na Jenoside babasanira inzu, borozwa inka ndetse banubakirwa uturima tw’igikoni.

Inka yahawe Uwambayinzobe izajya imukamirwa.

Inka yahawe Uwambayinzobe izajya imukamirwa.

Iki gikorwa cy’umuganda bagikoreye mu Murenge wa Kibilizi mu Karere ka Nyanza aho babanje gusura urwibutso rwaho bakanunamira inzirakarengane z’abagore basaga 300 bishwe mu jenoside yakorewe abatutsi muri Mata 1994 muri uwo murenge.

Abagize imiryango GAERG na AERG banakoze uturima tw’igikoni batwubakira abakecuru b’incike mu rwego rwo kubafasha kunoza imirire.

Uwambayinzobe Odette, umukecuru wasizwe iheruheru na Jenoside yakorewe abatutsi muri Mata 1994 wahawe inka n’uru rubyiruko yashimye uburyo bamufashe mu mugongo bamuha inka izajya imukamirwa.

Mu byishimo n’ibitwenge byinshi, yagize ati “Bana banjye! Iyi nka mumpaye igiye kumara irungu ndetse n’igifu cyanzengereje ngiye kujya ngiha amata ndebe ko nasunika iminsi rwose aho muvanye nyagasani ahabasubirize”.

Uyu mukecuru yakomeje avuga ko yibana mu nzu ya wenyine ariko ngo azakora uko ashoboye inka yahawe ayiteho kuko yari yaranateye ubwatsi akimara kubimenyeshwa ko azayorozwa.

Umuhuzabikorwa wa AERG mu ishuri rikuru ry’abalayiki b’abadivantisiti (INILAK), ishami rya Nyanza, Munyaneza Jean Bosco yabwiye Kigali Today ko impamvu yatumye bakora uyu muganda ari ugufasha abagizwe incike na Jenoside ndetse no kwitegura ibikorwa byo kwibuka Jenoside yakorewe Abatutsi mu w’1994 ku nshuro ya 21.

Uyu muganda abagize GAERG na AERG banawutijwemo ingufu n’abaturage bo mu Murenge wa Kibilizi babafasha mu bikorwa byose byo gufata mu mugongo abasizwe iheruheru na Jenoside yakorewe abatutsi muri Mata 1994 byasabaga ingufu.

Jean Pierre Twizeyeyezu – Kigali Today

Kigali - Rwanda
Office: IBUKA House, Kicukiro - Bugesera Road
Mob: +250 788 665 620 / +250 788 402 804
Email: gaergrwanda@gmail.com
© Copyright GAERG 2003 - 2017